AMED - Malbata Kabaîş têkildarî mirina keça xwe Rojîn Kabaîşê îfade de dozgerê nû hatiye peywirdarkirin. Malbatê xwest ku biryara nepeniyê ya li ser dosyayê were rakirin û faîl bên dîtin.
Xwendekara Beşa Pêşxistina Zarokan a Fakûlteya Perwerdeyê ya Zanîngeha Yuzuncu Yilê (YYU) Rojîn Kabaîş (21) di 27’ê Îlona 2024’an de li Wargeha Xwendekarên Keç a Fehîm Arvasî piştî xwarina şîvê bi awayekî guman winda bû. Cenazeyê Rojîn Kabaîşê 18 roj piştre li qeraxa Gundê Molla Kasimê hate dîtin. Ji bo lêpirsîna têkildarî mirina Rojîn Kabaîşê biryara nepeniyê hate dayin û hêj didome. Hinek dezgehên çapemeniyê hewl dan ku mirina Rojîn Kabaîşê weke “întîhar” bidin zanîn. Lê belê cîhaza şarjkirinê ya Rojîn Kabaîşê ya winda, bêdengiya hevala wê ya beriya winda bibe pê re axivî, DNA ya aydê du zilaman a li ser bedena wê hatine dîtin û bêdengiya rêveberên wargehê, gumanên heyî hêj mezintir kiriye.
DOZGER DÎSA ÎFADE GIRT
Malbata Rojînê dixwaze ku gumanên heyî bên zelalkirin û mirina wê bê ronîkirin. Di encama têkoşîna malbatê de dozgerê li lêpirsînê dinihêrt hate guherandin. Dozgerê ji bo lêpirsînê nû hatiye peywirdarkirin, di 16’ê Çileyê de bi rêya Pergala Deng û Dîmen (SEGBÎS) îfadeya malbata Kabaîşê girt. Bav Nîzamettîn Kabaîş û dayika wê Aygul Kabaîş îfade dan. Malbatê got ku keça wan hatiye kuştin û xwestin faîlên wê bên dîtin.
Nîzamettîn Kabaîş diyar kir ku piştî windabûna keça wê polîsên ji Wanê hatin li mala wan lêgerîn kirine û lêkolîn kirine bê ka Rojînê kîjan pirtûkxane bi kar aniye. Nîzamettîn Kabaîş, wiha got: “Keçên min jî jê re gotin ku Rojînê pirtûkxaneya li Parka Sumerê bi kar aniye. Wisa xuya dike ku ev kes çûne pirtûkxaneyê û agahiyên pirtûkên Rojînê xwendine wergirtine. Di nava pirtûkên wê de pirtûka Saît Faîk Abasiyanik a ‘Li windayî tê gerîn’ dîtine. Piştre jî ev yek weke delîla ‘întîharê’ nîşan dan.”
‘LI SER PIRTÛKÊ BINHIŞEK AVA KIRIN’
Bav Kabaîş, destnîşan kir ku di 14’ê Çileyê de çûye pirtûkxaneya li Parka Sumerê û pirtûkên keça wî xwendine lêkolîn kiriye. Kabaîş, wiha domand: “Min bi taybet pirsî bê ka kengî pirtûka ‘Li windayî tê gerîn’ kengî xwendiye. Piştre jî dokumanter derxist. Du kesên li wir dixebitîn gotin; ‘Erê rast e ew pirtûk standiye lê 8 meh beriya biçe dibistanê xwendiye.’ Anku pirtûk di 19’ê Sibata 2024’an de standiye. Di 13’ê Adara 2024’an de jî dîsa daye pirtûkxaneyê. Li gel wê pirtûkê, 2 pirtûkên din jî girtiye. Polîsan jî tiştek nedîtin û xwestin wê pirtûkê weke delîla întîharê nîşan bidin. Polîsan gotin ku ev pirtûk li Wanê xwendiye. Piştre jî ev agahî bi medyayê re parve kirin û xwestin ku weke întîhar kiribe nîşan bidin. Rojînê ew pirtûk ne li Wanê, li Amedê 8 meh beriya biçe dibistanê xwendiye. Min jî ev rewş dîsa bi dozger re parve kir û min xwest ev agahî li dosyayê bê zêdekirin. Dozger qebûl kir û got ku dê li ser bisekine.”
Bav Kabaîş xwest ku faîl bên dîtin û biryara nepeniyê ya li ser dosyayê bê rakirin.
‘BILA KUJERÊN ROJÎNÊ BÊN DÎTIN’
Dayika Rojîn Kabaîşê, Aygul Kabaîş jî diyar kir ku dozgerê nû têkiliya Rojînê ya bi malbatê re û kesayeta Rojînê ji wan pirsî ye. Aygul Kabaîş, wiha got: “Ji min pirsî bê ka herî dawî kengî bi Rojînê re axivî me. Psîkolojiya wê ji min pirs kir. Min jî hevdîtina xwe ya dawî vegot û min got ku morelê wê pir baş bû û tu pirsgirêk xuya nedikirin. Rojîn bi keyfxweşiyeke mezin çû dibistanê û dixwest bibe mamoste. Em dixwazin kujerên wê bên dîtin û cezayê herî giran lê were birîn. Bila kujerên Rojîna min li kolanan negerin.”