AMED- Li Amedê “Înîsiyatîfa Yekitiyê” ku ji nûnerên partiyên siyasî, sazî û dezgehên civakî, rûspî, oldar û kesayetan pêk tê hat ragihandin. Di civînê de hate xwestin ku ji bo çareserkirina pirsgirêka kurd, aştiyeke mayînde û civaka demokratîk piştgiriya inîsiyatîfa were kirin.
Li Amedê bi beşdariya nûnerên partiyên siyasî yên Kurdistanî, saziyên sivîl ên civakî, rûspî, oldar û bawermend, kesayet, parlamenter ji bo ragihandina “Înîsiyatîfa Yekitiyê” li Çand Amedê civîn li dar dixin. Civînê îro dest pê kir û wê heta sibê bidome. Hevserokê Giştî yê DBPê Keskîn Bayindir, nûner û rêveberên partiyên Kurdistanî, rêxistinên sivîl, rûpsî, kesayet û gelek kes tev li bûn. Li eywanê bi zaravayên Kurmancî û Kirmanckî yên Kurdî, Tirkî, Erebî, Suryanî û Ermenkî pankarta “Em ê bi helwesta yekitiyê bi ser bikevin” hate daliqandin.
Civîn bi hilbijartina dîwanê û rêzgirtina ji bo cangoriyên Kurdistanê dest pê kir. Salîha Aydenîz, Dîba Keskîn, Nahît Eren, Kasim Firat û Ayetullah Aştî ji bo dîwanê hatin bijartin.
Dû re yek ji endamê Înîsiyatîfê Orhan Ayaz axaftina destpêkê kir û têkildarî pêvajoya ku piştî banga Rêberê Gelê Kurd Abdullah Ocalan dest pê kir nirxand û xwest ku piştgiriya vê pêvajoyê bê kirin. Ayaz da zanîn ku ji bo ragihandina “Înîsiyatîfa Yekitiyê” 9 mehan xebat meşandin e û got: “Çavê temamê Kurdistan û cîhanê li vê civîna me ye. Em ê jî li ser vê bingehê civîna xwe pêk bînin.”
Dû re parlamentera DEM Partiyê ya Mêrdînê Salîha Aydenîz qala xebatên Sirri Sureya Onder û tevkariya wî ya li pêvajoya heyî kir û ji malbata wî, DEM Partiyê û gelê Kurd û Tirkiyeyê re sersaxî xwest. Salîha Aydenîz destnîşan kir ku ji bo aştî û demokrasî were vî welatî dê xebatên wan bidomin.
Salîha Aydenîz bal kişand ser banga “Aştî û Civaka Demokratîk” a Rêberê Gelê Kurd Abdullah Ocalan û wiha got: “Ji bo ku ev bangawazî bigihije armanca xwe xebatan dimeşînin. Em ê li bakurê Kurdistanê û Tirkiyeyê yekitiya xwe pêk bînin. Yekitiya her çar aliyên Kurdistanê wê li Sûriye, Iraq, Îran û Tirkiyeyê demokrasiyê pêş bixe. Gelê Kurd têkoşîna azadiyê dide û ji bo demokrasi mayînde bibe têdikoşe.” Salîha Aydenîz her wiha bal kişand ser kongreya PKKê ya di navbera 5-7ê Gulanê de pêk hat û got: “Divê jin, ciwan û civak zêdetir bi rola xwe rabin. Em di serî de yekitiya xwe pêk bînin û bi pêş ve bibin. Em ê li ber van gavên dîrokî berpirsyartiya xwe bi cih bînin. Em spasiya hemû kesên ku ked dane avakirina înîsiyatîfê dikin.”
Dû re parlamenterê DEM Partiyê yê Wanê Sînan Çîftyurek axivî. Sînan Çîftyurek qala xebatên ku çend meh in ji bo Înisiyatîfa Yekitiyê meşandine kir û da zanîn ku xwe gihandin gelek kesan û vê civînê di vê çarçoveyê de pêk tînin.
Sînan Çîftyurek bal kişandin geşedanên li Rojhilata Navîn û wiha got: “Dewletê bi birêz Abdullah Ocalan re hevdîtin kir. Vê hevdîtinê ji bo çareserkirina pirsgirêka kurd hêviyek derxist holê. Em hişmendî û realiteya Kurdistanê digirin ber çavan û me xwest bi hemû pêkhateyan em civînê li dar bixin. Birêz Ocalan ji bo çareserkirina meseleya kurd û demokratîkbûna civakê bang kir. Em weke înîsiyatîf vê bangê girîng dibînin. Duh jî PKKê kongreya xwe li dar xist û gotin dê çekan danin. Banga me ya ji gelê me re jin û ciwanan, rewşenbîr û seydayan re ew e ku ji bo çareserkirina pirsgirêka kurd, zimanê Kurdî bibe zimanê fermî û perwerdehiyê û ji bo aştiyeke mayînde û civaka demokratîk piştgiriyê bidin Înîsiyatîfa Yekitiyê.”
Sînan Çîftyurek bal kişand ser Konferansa Yekrêzî û Yekhelwestiya Kurdî ya li Rojavayê Kurdistanê ku li Qamişlo pêk hat û wiha got: “Konferanseke girîng pêk hat. Ev ji bo her çar parçeyên Kurdistanê û seranserê Sûriyeyê girîng bû û biryarên girîng girtin. Gotin em Kurd yek deng in. Hêvî dikim ku ev Înîsiyatîf li vê derê biryareke baş bigire û rêya me veke.”
Piştî axaftinan civînê ji çapemeniyê re girtî berdewam kir.