NAVENA NÛÇEYAN – Di rapora NY'yê ya têkildarî revandina jin û keçên zarok de, banga lêpirsîna lezgîn hate kirin.
Li gorî rapora Neteweyên Yekbûyî (NY) ku roja Çarşemê hate weşandin, ji Adara 2025’an û vir ve li Lazkiye, Tartûs, Hama, Hûms, Şam û Helebê 38 jin û zarokên keç ên Elewî hatin revandin û dîmenên wan hatin weşandin. Pispor van bûyeran weke parçeyek ji tundiya berfireh a li Sûriyeyê ya li hemberî jin û hindikahiyên olî yên li Sûriyeyê dibînin.
Li gorî raporê, jin û zarokên keç ên ji 3 heta 40 salî, bi giranî nava rojê -dema diçûn dibistanê, serdana xizmên xwe, yan jî ji bo demeke kurt ji malê derketin- hatin revandin. Hate ragihandin ku piştî bûyerê bi giranî gef li malbatên wan hate xwarin ku ji raya giştî re neaxivin û destpêkirina lêpirsîna fermî hate astengkirin.
REVANDIN Û DÎLGIRTIN
Pisporên Neteweyên Yekbûyî diyar kirin ku li gorî agahiyên gihîştin ber destê wan hin ji mexdûran di dema dîlgirtinê de hatin tevizandin û êrîşên fîzîkî li wan hate kirin. Her wiha di raporê de hate gotin, zarokên keç bi zorê hatin zewicandin. Pispor dibêjin, ev rewş nîşan dide ku li hemberî jin ên Elewî kampanyayeke bi rêk û pêk a li ser zayendîperestiyê tê meşandin.
HIKUMETA DEMKÎ YA SÛRIYEYÊ HATE REXNEKIRIN
Di raporê de hate gotin, “Ev rewşa xemsar ne tenê travmaya mexdûran û xizmên wan kûr dike; di heman demê de atmosfera bêcezahiştinê jî mezin dike” û bi tundî hikumeta demkî ya Sûriyeyê hate rexnekirin.
Di raporê de hate ragihandin ku di gelek bûyeran de hikumetê lêpirsîneke bê alî û di dema xwe de nekir, hin caran jî gilî û gazinên malbatan li ber çavan nehate girtin û bang li hikumetê hate kirin ku dawî li vê tundiyê bîne û baweriya bi sîstema edaletê ji nû ve ava bike.
‘DIVÊ LÊPIRSÎN BÊ DESTPÊKIRIN’
Di raporê de berpirsyariya lêgerîna li kesên winda li bîra hikumeta Sûriyeyê hate xistin û jê hate xwestin, têkildarî îdîayan tavilê lêpirsînên berfireh, serbixwe û bê alî bimeşîne, kiryaran tespît bike, darizîne û mirovên rizgarkirî jî ewle û rehabîlîte bike.
BANGA PARASTINA KÊMÎNEYAN
Di raporê de her wiha hate bibîrxistin ku êrîşên li ser hindikahiyan zêde dibin û revandina kuştina jin û zarokên Durzî yên li Suwêdayê hate bibîrxfistin. Her wiha ‘pêwîstiya jiyanî û lezgîniya’ parastina van civakan hate destnîşankirin.
Di raporê de hate gotin, “Mirovên ji kêmîneyên etnîkî û olî jî di nav de mafê hemû jin û zarokên keç heye ku bi rengekî ewle û bi rûmet bijîn.”